LIVE TV
ലോകത്തിലെ ഏറ്റവും ശക്തമായ പാസ്പോര്ട്ടുകളെക്കുറിച്ച് ചിന്തിക്കുമ്പോള് സാധാരണയായി ജപ്പാന്, സിംഗപ്പൂര്, സ്വിറ്റ്സര്ലന്ഡ് തുടങ്ങിയ രാജ്യങ്ങളിലെ പാസ്പോര്ട്ടുകളൊക്കെയാണ് ആളുകളുടെ മനസ്സിലേക്ക് വരുന്നത്.
എന്നാല് ലോകത്തിലെ ഏറ്റവും അപൂര്വമായ പാസ്പോര്ട്ട് ഒരു രാജ്യത്തിന്റേതല്ല. സ്വന്തമായി രാജ്യമോ പ്രദേശമോ ഇല്ലാത്ത ഒരു അതുല്യമായ പരമാധികാര സ്ഥാപനമായ 'സോവറിന് മിലിട്ടറി ഓര്ഡര് ഓഫ് മാള്ട്ട'യാണ് ഇത് നല്കുന്നത്. ലോകമെമ്പാടുമുള്ള 500 പേര്ക്ക് മാത്രമേ ഈ അസാധാരണ നയതന്ത്ര പാസ്പോര്ട്ട് ഉള്ളൂ.
അന്താരാഷ്ട്ര നിയമത്തില് സോവറിന് മിലിട്ടറി ഓര്ഡര് ഓഫ് മാള്ട്ടയ്ക്ക് വളരെ പ്രധാനപ്പെട്ട ഒരു സ്ഥാനമുണ്ട്. അന്താരാഷ്ട്രതലത്തില് ഒരു പരമാധികാര സ്ഥാപനമായി ഇത് അംഗീകരിക്കപ്പെട്ടിരിക്കുന്നു. ഐക്യരാഷ്ട്രസഭയില് നിരീക്ഷക പദവിയും സോവറിന് മിലിട്ടറി ഓര്ഡര് ഓഫ് മാള്ട്ട വഹിക്കുന്നു. കൂടാതെ ലോകമെമ്പാടുമുള്ള നിരവധി രാജ്യങ്ങളുമായി നയതന്ത്ര ബന്ധം നിലനിര്ത്തുന്നുമുണ്ട്.
സാധാരണ പാസ്പോര്ട്ടുകളില് നിന്ന് വ്യത്യസ്തമായി പൗരത്വത്തിന്റെയോ ദേശീയതയുടെയോ അടിസ്ഥാനത്തിലല്ല മാള്ട്ട, പാസ്പോര്ട്ട് നല്കുന്നത്. പകരം ഗ്രാന്ഡ് മാസ്റ്റര്, ഗവേണിംഗ് കൗണ്സില് അംഗങ്ങള്, മുതിര്ന്ന നയതന്ത്ര പ്രതിനിധികള്, അന്താരാഷ്ട്ര മാനുഷിക ദൗത്യങ്ങളില് ഏര്പ്പെട്ടിരിക്കുന്ന ഉദ്യോഗസ്ഥര് എന്നിവരുള്പ്പെടെ വളരെ പരിമിതമായ മുതിര്ന്ന ഉദ്യോഗസ്ഥര്ക്ക് മാത്രമേ ഇത് നല്കുന്നുള്ളൂ. യോഗ്യത, ഔദ്യോഗിക ഉത്തരവാദിത്തങ്ങള് എന്നിവയെ ആശ്രയിച്ചാണിത്.
ഔദ്യോഗിക ആവശ്യങ്ങള്ക്ക് മാത്രമേ ഇവ ഉപയോഗിക്കാന് കഴിയൂ. ടൂറിസം, കുടുംബ അവധിക്കാല യാത്രകള്, സ്വകാര്യ അന്താരാഷ്ട്ര യാത്ര എന്നിവയ്ക്കായി ഉടമ ഇത് ഉപയോഗിക്കാന് പാടില്ല. പാസ്പോര്ട്ട് ഉടമ മാനുഷികമോ നയതന്ത്രപരമോ ആയ കടമകള് നിര്വഹിക്കുമ്പോള് മാത്രമേ ഈ പാസ്പോര്ട്ടിന് സാധുതയുള്ളൂ. ഈ വ്യക്തിയുടെ ദൗത്യമോ കാലാവധിയോ പൂര്ത്തിയാകുമ്പോള്, പാസ്പോര്ട്ട് ഉടന് തിരികെ നല്കണം.
അപൂര്വമായി ലഭിക്കുന്ന പാസ്പോര്ട്ട് ആണെങ്കിലും ലോകമെമ്പാടുമുള്ള എല്ലാ രാജ്യങ്ങളും ഇത് അംഗീകരിക്കുന്നില്ല. നിലവില് ഏകദേശം 115 രാജ്യങ്ങള് ഈ പാസ്പോര്ട്ടിനെ ഒരു സാധുവായ നയതന്ത്ര യാത്രാ രേഖയായി അംഗീകരിക്കുന്നതായി റിപ്പോര്ട്ടുണ്ട്. എന്നിരുന്നാലും, അമേരിക്ക, ഇംഗ്ലണ്ട്, ന്യൂസിലാന്ഡ് തുടങ്ങിയ ചില രാജ്യങ്ങള് ഇത് അംഗീകരിക്കുന്നില്ല.
ഈ പാസ്പോര്ട്ട് കാഴ്ചയില് വളരെ വ്യത്യസ്തമാണ്. ഇതിന്റെ കടും ചുവപ്പ് നിറത്തിലുള്ള കവറില് 'സോവറിന് മിലിട്ടറി ഓര്ഡര് ഓഫ് മാള്ട്ട' എന്ന് സ്വര്ണ്ണ അക്ഷരങ്ങളില് എഴുതിയിട്ടുണ്ട്.
രാജകീയമായി തോന്നുന്ന പേരും സൈനിക ചരിത്രവും ഉണ്ടായിരുന്നിട്ടും 'ഓര്ഡര് ഓഫ് മാള്ട്ട' ഇന്ന് പ്രധാനമായും മാനുഷിക, വൈദ്യസഹായങ്ങളിലാണ് ശ്രദ്ധ കേന്ദ്രീകരിക്കുന്നത്. അടിയന്തര ദുരിതാശ്വാസ പ്രവര്ത്തനങ്ങള്, വൈദ്യസഹായ പ്രവര്ത്തനങ്ങള്, അഭയാര്ത്ഥി സഹായം, ദുരന്ത നിവാരണ പരിപാടികള്, സംഘര്ഷ മേഖലകളിലെ ആരോഗ്യ സംരക്ഷണ സഹായം എന്നിവ ഇതിന്റെ പ്രവര്ത്തനങ്ങളില് ഉള്പ്പെടുന്നു.
Content Highlights :The rarest passport in the world, with only 500 people in the world. The world's rarest passport does not belong to a country. It is issued by the 'Sovereign Military Order of Malta', a unique sovereign institution that does not have its own country or territory.
